Расіянка паказала у сацсетцы Х масла са свайго халадзільніка. На прадукце надпіс «сделано в Белоруссии». Аднак у самой Беларусі такога не сустрэнеш, і беларускія карыстальнікі ўсумніліся ў сапраўднасці масла. Пры гэтым на ўпакоўцы напісана, што зробленае яно ў Паставах. Рэч можа быць у расійскай гандлёвай сетцы.
Пост расіянкі са словамі «знайшла ў халадзільніку беларускае масла, і вы не паверыце…» набраў больш за 40 тысяч праглядаў менш чым за суткі. На прымацаваным фота відаць надпіс «сделано в Белоруссии» на ўпакоўцы сметанковага масла. У каментарах беларусы пішуць, што, хутчэй за ўсё, прадукт несапраўдны — у Беларусі не выкарыстоўваюць слова «Белоруссия» для абазначэння прадуктаў.
У адказ расіянка апублікавала звесткі з упакоўкі пра вытворцу — ім пазначаны Пастаўскі малочны завод на Віцебшчыне. Тамсама можна заўважыць і частку надпісу «выраблена на заказ».
Магчыма, разгадка менавіта ў гэтым — бо гэтае масла зробленае на заказ расійскай гандлёвай сеткі «Монетка». У сеціве можна сустрэць і іншы варыянт упакоўкі ўсё з той жа «Белоруссией». Відаць, гэта прадукт, зроблены спецыяльна для гандлёвай сеткі. Расфасаваць яго маглі ўжо ў РФ.
Дарэчы, можна сустрэць, напрыклад, сыр з тым самым вытворцам, з тым самым надпісам, з той самай «Монетки». Штрыхкод там беларускі — пачынаецца з 481. Пры гэтым стыль упакоўкі чамусьці капіюе марку «Брэст-Літоўск».
У Беларусі, як і ў суседніх краінах, гандлёвыя сеткі таксама прадаюць тавары пад уласнымі брэндамі — напрыклад, ёсць «Сваё» ад «Еўраопта» або «Местное известное» ад Green.