Улады Мінска змянілі планы будаўніцтва чацвёртай лініі метрапалітэна. Праз гэта ў мікрараёне Зялёны Луг збіраюцца адкласці знос прыватных дамоў. Пра новы маршрут лініі расказаў старшыня камітэта архітэктуры і горадабудаўніцтва Мінгарвыканкама Віктар Гуцько, паведамляе агенцтва «Мінск-Навіны».
Праз змяненні ў планах будаўніцтва чацвёртай лініі метрапалітэна знос прыватных дамоў у Зялёным Лузе можа быць адкладзены, расказаў чыноўнік.
— У горадабудаўнічай дакументацыі прадугледжваецца знос дамоў на вул. М. Багдановіча ў рамках пракладвання метрапалітэна. Але найбліжэйшым часам гэтага, відаць, не будзе. Лінію метро мы давядзём да плошчы Бангалор, а далей плануем рухацца ўздоўж вул. Арлоўскай і пр. Пушкіна ў бок станцыі метро «Пушкінская», дзе будзе скрыжаванне з другой лініяй метро. Планаў што да пракладвання метро ў напрамку Зялёнага Луга ў найбліжэйшай перспектыве ў нас няма, — растлумачыў Гуцько.
Разам з тым пад знос пойдзе прыватная забудова ўздоўж вул. Арлоўскай, якая трапляе ў межы вытворчасці работ па будаўніцтве метро, удакладніў ён.
Нагадаем, першапачаткова планавалася, што Зеленалужская лінія мінскага метро будзе праведзеная да Зялёнага Луга. У прыватнасці, меркавалася, што на поўнач ад станцыі «Парк Дружбы народаў» (плошча Бангалор) будуць пабудаваныя таксама станцыі «Івана Мележа», «Зялёны Луг» і «Лагойская».
Чацвёртая лінія мінскага метро запланаваная як кальцавая.