Абломкі расійскага беспілотніка на тэрыторыі Румыніі пашкодзілі апору ліній электраперадачы і гаспадарчыя пабудовы недалёка ад горада Галац на паўднёвым усходзе краіны. Пра гэта паведаміла Міністэрства абароны Румыніі.
У ведамстве заявілі, што падчас расійскай начной атакі на Украіну падымалі ў паветра знішчальнікі Eurofighter Typhoon. Пілотам было дазволена атакаваць беспілотнікі.
Наземныя радары Міністэрства нацыянальнай абароны адсочвалі групу цэляў у раёне партовага горада Рэні (украінскі порт, размешчаны на левым беразе ракі Дунай), дзе былі зафіксаваныя шматлікія выбухі.
Пра падзенне беспілотніка экстранным службам паведамілі мясцовыя жыхары. Паліцыя і вайскоўцы, якія прыбылі на месца, знайшлі фрагменты беспілотнікаў.
«Міністэрства нацыянальнай абароны рашуча асуджае безадказныя дзеянні Расійскай Федэрацыі і падкрэслівае, што яны ўяўляюць сабой новы выклік рэгіянальнай бяспецы і стабільнасці ў Чарнаморскім рэгіёне.
Такія інцыдэнты дэманструюць грэбаванне Расійскай Федэрацыяй міжнародным правам і ставяць пад пагрозу не толькі бяспеку румынскіх грамадзян, але і калектыўную бяспеку NATO», — гаворыцца ў заяве Мінабароны Румыніі.
Раней расійскія дроны парушалі паветраную прастору Румыніі падчас удараў па ўкраінскіх партах, але матэрыяльнай шкоды дагэтуль не было.
Нагадаем, ноччу Украіна зазнала масіраваную расійскую атаку. У прыватнасці ў Адэскай вобласці ўдар быў нанесены па прыпартовай інфраструктуры.